Ganwyd i deulu sy’n ffermio yng ngogledd ddwyrain Cymru (ardal Dinbych). Roedd ei thaid ar ochr ei thad yn gerddorol fel yn wir mae ei mam.

Gwnaeth gystadlu ac ennill llawer fel plentyn a thra yn ei harddegau mewn eisteddfodau mawr a bach ac yn genedlaethol – yn canu (clasurol, gwerin a cherdd dant) a hefyd yn perfformio ar y delyn.

Enillodd hefyd yn Eisteddfod Ryngwladol Llangollen ac am nifer o flynyddoedd gwahoddwyd hi i ganu yn seremoni agoriadol yr eisteddfod honno.

Mae wedi teithio tramor fel unawdydd gwâdd gyda gwahanol gorau ac yn canu’r delyn gyda cherddorfa ieuenctid.

Yn wir mae wedi ennill rhan fwyaf o wobrau yn yr eisteddfod genedlaethol (a’r Urdd), nid yn unig fel unawdydd, ond hefyd fel rhan o ddeuawd a thriawd cerdd dant. Bellach mae wedi troi at arwain a hyfforddi.

Tra’n astudio Cymraeg ym Mhrifysgol Bangor, arweiniodd nifer o gorau o fyfyrwyr i lwyddiant mewn cystadlaethau cenedlaethol megis yr Wyl Gerdd Dant

Yn 1992 fe briododd gan ddechrau ar ei gyrfa fel athrawes ysgol gynradd.Mae ei chorau plant yn aml yn cael llwyddiant cenedlaethol fel yn wir nifer o’i disgyblion preifat.

Bellach mae ganddi ddwy ferch – un yn unarddeg oed a’r llall yn wythoed. Oherwydd galwadau teulu bellach mae’n athrawes fro yn dysgu Cymraeg a cherdd.

Mae ganddi gymhwysterau gradd wyth mewn piano, telyn a llais yn ogystal â gradd anrhydedd o Brifysgol Cymru, Bangor.

Mae’n mwynhau trefnu cerddoriaeth draddodiadol ac wedi cyfansoddi darnau llais ar gyfer plant.

Yn ystod y blynyddoedd diwethaf mae Nia wedi bod yn beirniadu ar lefel leol a chenedlaethol yn ogystal ag ymddangos fel ‘beirniad answyddogol’ yn ystod amli eisteddfod genedlaethol, ar radio a theledu.

Er nad yw bellach yn cystadlu fel unawdydd, mae’n dal i fwynhau perfformio mewn cyngherddau, ar raglenni cerdd ar y teledu a gyda’r côr.

ARWYN EVANS – trysorydd

Mae Arwyn yn gweithio i Adran Gyllid Cyngor Sir Gaerfyrddin. Yn ogystal â dal swydd gyfrifol mae hefyd yn dal nifer o swyddi gwirfoddol o fewn y gymuned. Mae’n glerc i gyngor lleol, yn flaenor ac ysgrifennydd y capel a’r ofalaeth, yn drysorydd Menter Iaith Bro Dinefwr, ac ef oedd trysorydd Eisteddfod Genedlaethol Dinefwr yn 1996 pan ddaeth hi i ardal Llandeilo. Mae ef a’i wraig (Shân Evans) yn gefnogwyr ymarferol a gweithgar i nifer fawr o fudiadau gwirfoddol yn yr ardal. Mae ganddynt un mab sy’n gweithio yng Nghaerdydd ac un ferch sy’n astudio yn y Brifysgol yng Nghaerdydd.
.

Mae Gareth yn byw yn Llandeilo gyda’i wraig a dau o fechgyn ers dros ddeng mlynedd. Mae’n gweithio i gwmni Teledu Telesgôp.

Cafodd Gareth ei fagu i deulu cerddorol ym Mlaenau Ffestiniog. Yn y dyddiau cynnar roedd yn gyfarwydd â chanu ar lwyfannau steddfodau capeli, y gymanfa ganu a’r Band of Hope wrth gwrs!!

Gan fod ei dad yn unawdydd ac yn arweinydd côr roedd yn gyfarwydd iawn â chanu corawl hyd yn oed pan oedd yn y crud! Yr atgof cyntaf sydd ganddo yw gwrando ar gôr Y Fyddin Goch o Rwsia pan oedd yn bump oed yn dawnsio a chanu nerth eu pennau yn Lerpwl. Dyna berfformiad sy’n aros yn y cof am byth.

Er nad yw’n offerynwr fel aelodau eraill o’r teulu mae wedi mwynhau canu erioed. Dysgodd ganu bas yn y ‘deep end’ fel petai pan ddechreuodd ganu gyda Chôr y Brythoniaid a chael ei hun yn canu ochr yn ochr ag enillydd y Rhuban Glas, John Llewellyn Thomas – dyw ei glust chwith byth wedi bod yr un fath ers hynny! Er na chafodd lwyddiant yn y genedlaethol gyda’r Brythoniaid cafodd lawer iawn o hwyl a phrofiad gwerthfawr iawn.

SHÂN EVANS – cynorthwyo gyda throi’r tudalennau

Mae Shân yn briod ag Arwyn Evans y trysorydd. Yn ogystal â bod â’r cyfrifoldeb o droi’r tudalennau mewn cyngherddau a chystadlaethau, mae hefyd yn gofalu yn wythnosol am blant Nia Clwyd er mwyn rhyddhau ei gwr i ganu yn y côr.
Mae Shân fel ei gwr yn drefnus ac yn drefnydd effeithiol gan gefnogi yn ymarferol nifer o fudiadau a digwyddiadau yn ardal Llandeilo.

ARWYN DAVIES - arweinydd nosweithiau/cyngherddau

Mae Arwyn Davies yn ffermwr a wnaeth ymddeol yn gynnar. Yn ogystal a llenwi ei amser gyda gwaith gwirfoddol mae'n Ynad Heddwch ac yn weithagr mewn sawl cymdeithas yn yr ardal. Pan oedd yn ifancach bu'n weithagr iawn gyda Mudiad y Ffermwyr Ieuanc, ac yn ogystal a dal nifer o swyddi o fewn y mudiad hwnnw, bu hefyd yn teithio yn eu cwmni, gan gynnwys taith o rai misoedd i Awstralia. Bu hefyd am nifer o flynyddoedd yn un o griw y noson lawen yn Glansefin ac mae wedi cyflwyno cyngherddau a nosweithiau llawen led led Cymru. Am gyfnod fe fu'n darlledu ar faterion amaethyddol. Bellach mae'n un o griw o sylwebyddion yn y Sioe Fawr yn Llanelwedd bob blwyddyn. Mae ganddo stor o jocs - addas ar gyfer pob cynulleidfa. Mae'n briod gyda Jean ac mae ganddynt dri o blant a bellach hefyd maen nhw'n ddadcu a mamgu balch iawn.

GARY ANDERSON - unawdydd

Picture is being processed!!!

Tenor dawnus iawn sydd wedi ennill yn yr Eisteddfod Genedlaethol nifer fawr o weithiau. Wrth ei waith bob dydd mae'n ddirprwy brifathro yn Ysgol Gymraeg Porth Tywyn ac yno mae wedi hyfforddi sawl parti a chor i lwyddiant cenedlaethol. Mae'n briod a chanddo ddau o blant ac yn byw yng Nghwm Gwendraeth. Mae ei lais clir swynol yn gwefreiddio cynulleidfaoedd ac mewn cyngerdd mae cryn edrych ymlaen at ei berfformiadau. Yn sicr mae'r cor yn ffodus iawn o ddawn a llais rhywun fel Gary.